**** حلم السنين ****

و إيه يعني تتوه بينا خطاوينا

وإيه يعني مادام ننسى ماضينا

تعالى ياحلم عشته سنين

نحقق بيك أمانينا

دا أنت شوقي وحنيني

وحضنك ديما  بيحميني

هفضل عمري أتمناك

ويحلى المر وأنيني

همسي شوق حنين وغرام

شعور صادق مش أي كلام

لما حروف الحب تشوفه

تقول والله ولا ف الأحلام

افتح قلبك واسمع همسي

يمكن تفهم نبضي وحسي

لما تشوف صورتك بعيوني

هتعرف إنك بكره وأمسي

أيوه أنا عارف إني جرئ

وأحساسي بيك صادق وبرئ

لكن أعمل إيه يا حبيبي

وأنا ف بحرك عاشق وغريق

هعدي في الهوى بحورك

وأكون ظل شعاع نورك

ولو قابلت يوم أحزان

هجيلك أحتمي في دورك

بعاهدك والعهد بينا أمان

هصونك لو غدر  الزمان

وعمري أقدمه هدية

وأقول فداك يا نبع حنان

******************************

بقلم / مصطفى كرم
النهر الاصيل