****رتوش****
معرض وفيه كل الوشوش
وش بيبكي ووش بشوش
ووش كالح من غير ملامح
مهما تشوفه متعرفوش
ألبس يلا يا صاحبي قناعي
وأدوات ألوان ورتوش
وش بريء وسط دبابة
لازم يبقى م الوحوش
أقنعة زايفة تداري بلاوي
ليه بتبرقوا متنكروش
شايل جبل الحزن وماشي
وتشوف ضحكه تقول فرفوش
ووش طيب كله طيابة
بس خسارة عايش في غابة
فلازم يلعب ع الحبلين
لأجل أسودها مينهشهوش
وأدي صاحب كان مصاحب
جت له الفرصة قال يا مراحب
خان الصحبة لأجل النزوة
وعيشه وملحه ممنعهوش
عامل فيها رمز الوفاء
يضحي بعمره وكله عطاء
واما يغيب صاحبه عن داره
في لحظة يبقى ياحواش حوش
أما الأب دا حمله تقيل
م الدنيا دي عمال يشيل
ماشي يفكر في جهاز بنته
والإيد فاضية وحافه قليل
راح بسرعة يشوف تساهيل
تجهيز كامل وعرض جميل
وأمضي يا سبع على الاقساط
لبس أساور والفرح متمهوش
وأم تمام أولادها أيتام
رغم الأسية معرفتش بغية
تمسح وتكنس وكمان خدام
لأجل ولادها تعلى الهام
ويفتخروا بيها مينكروش
ودا راجل دين ودقنه متين
عطف وإحسان والنية طين
بس خلي بالك
كل قناع جميل خداع
مهما غدر أو حتى وباع
هييجي له يوم ولا هيدوم
وساعتها الناس ما تحترموش
********************************
بقلم / مصطفى كرم
Mustafa Karm
خاص بالنصوص المميزة
D. Hodaaabdo 
أضف تعليق