**** هدية الرحمن ****
دايب انا في عيونك

والشوق ليك برهاني

عاشق عيون المها

تبقى سكني و عنواني

علي شط بحرك الصافي

أشرب وارجع أقول تاني

من يوم ما شوفت عيونك

بقيتي بحري وشطآني

قالت انت حواليك كتير

شاغلين عيونك عني

مرة سمرة ومرة شقرة

وأنت تزيد فيها وتجنني

نفسي أحس إني وحيدتك

وألقى عيونك لي بتحضني

وقتها بس … يمكن  أفكر

افتح قلبي  لهواك يسكني

معقول !  يا فرحة عمري

تايهة عني مش عارفاني

دا انت يا قلبي سر وجودي

وسحر عيونك هد كياني

شايفك نجم قريب وحبيب

يحضن عشقي ايديه محوطاني

ليلك كله شعاع من نور

يروي ورودي يزيد افناني

قالت  بكل غرام ودلال

أفكر يمكن تبقي حلال

وألاقي معاك أحلامي ف بكرة

ودنيا جميلة ولا في الخيال

الفرحة حضنت شفايف

تطمن قلب تملي خايف

تقوله خلاص أنسي الحرمان

هتخبي ليه والكل عارف

هاتي أيديك ويا إيديا

نبني لبكرة وأيام جايا

ويبقي الحب طريق ممدود

وأجمل قصة ليك وليا

أيوه يا ضي العين والنني

خدني في حضنك يلا انصفني

وخلي هوانا يعيش في النور

علشان  كل الناس ظالميني

كنت بشوفك شط أمان

بحر وهايج فيضه حنان

اقول ازاى يبقى نصيبي

ونعيم دايم من الرحمن

**********************************

بقلم / مصطفى كرم