مش عارف
ليه الحزن ديما ساكن ف العيون
ليه كل الوجوه بقي ليها ألف لون
ليه الحاجات الحلوة شايفينها جنون
نعيب علي الدنيا ونلعن زمن مغبون
العيب جوانا أحنا نسينا إزاي نصون
وإزاي نخلص ويبقى ودنا بحر حنون
يملانا بالمودة فيطرح أمل ميمون
يعلمنا ننسى الجراح والعمر اللي راح
نعشق معاه الصباح ونغني غنا أفراح
نسيب لحن البكا ونمحى صوت النواح
__________________________________________________________
مش عارف
ليه كل حاجة بينا بقى ليها تمن
حتى الشعور فينا خلاص مات وادفن
والضمير جوه بير راح واتسجن
نعلي صوت المصلحة وقت المحن
وبكام دولار ملناش أسعار ننشر فتن
نزيد هموم بعضنا فنزيد شجن
والسوس ينخر جوه منا صابنا الوهن
بدل طباعنا خلاص طبعنا نعشق بدن
ما نشوف العيبة حاجة غريبة كأننا وثن
حتى الغيبة بقت قريبة وحضن وسكن
__________________________________________________________
مش عارف
ليه نتباهى بالمدنية وتجري فى دمنا
ونقلد ناس ما ليها أساس ولا مننا
فكر غريب وفعل عجيب مش طبعنا
هدوم عريانة وبكل مهانة ملت حينا
وشباب توهان م الأدمان رمى حملنا
عايش مخمور وبكل فجور ينصح لنا
ياعم كبر وتعالى عمر دماغ رايقة زينا
حمل إيه اللي بتقولى عليه فى عصرنا
لحد امتى هنفضل تايهين عن بعضنا
نترحم على الأخلاق ونقول دا حظنا
امتى الأخلاق تعود وتنور دربنا
ونمشي طريق الخير ونرضي ربنا
******************************
بقلم / مصطفى كرم
خاص بالنصوص المميزة
D. Hodaaabdo 
أضف تعليق