**** أرض بور ****
أنا أرضي كانت بور

وطارحة بالصبار

فروعها شوك وعويل

والطعم كله مرار

لا ضهرى يوم انحنى

ولا مليت انتظار

حالفة أمشي طريقي

مهما طال المشوار

سقيت من صبرى جوفي

لما انكويت بالنار

بستاني أصله عليل

ولا يوم غرس أزهار

م الهم شارد تملي

ويعانى م الأفكار

إزاى يبقي عقيم

ويسيب حياته تنهار

الكل رافض لطرحه

ويعامله باحتقار

فكر ف نبت غريب

يفرح به الدار

الأهل قادوا  وهاجوا

لازم ياخدوا قرار

قطعوا  حبال الود

ورضيوا له بالدمار

ورغم كل العذاب

واجهنا الإنكسار

الغرس كبر وعفي

وخلى حياتنا عمار

قولنا خلاص يا دنيا

ضحكتي للأبرار

الزهرة عروسة جميلة

يتقال  فيها أشعار

الكل طالب رضاها

يتمنى يجني الثمار

واللى كان من نصيبها

عادانا بدون أعذار

صرخ بعلو الصوت

أنتوا  ناس أشرار

تحرم  اليوم عليكم

ما تشوفوها ليل ونهار

النبت مش نبتكم

ودا  حكمة الاقدار

حكم علينا فراق

وننكوى بالنار

لا يوم رحم دموعي

ولا مرة كتم أسرار

فكرت أنهي حياتي

أصل بعدها انتحار

صعب عليه مذلتي

قدم ليا الأعتذار

رجع قوام زهرتي

دى رحمة م القهار

صدق مثلنا زمان

خدناه ف الإعتبار

الأم مش اللى ولدت

من رحم وقرار

الأم هي اللى ربت

وخلتك مغوار

***********************

بقلم / مصطفي كرم