*** فين ياسين ***
يا بهية فين ياسين
فين قلوعه المفرودين
وزئيره اللي بيرعب
الكلاب الملاعين
صحي فيه صوت الشهامة
ردي فيه عرق الكرامة
لاجل ما يرفع جبينه
ويعلم الندل الندامة
كل شئ في ايدينا بح
والجيوب فضيت خلاص
م الشكاوي صوتنا اتنبح
يارب فين بس الخلاص
من زمان واحنا عبيد
ما شوفنا يوم غير الوعيد
واللي فينا صوته يعلا
ما ياخد غير ضرب الجريد
كرباج نازل م الأتاوة
يحفر جوانا العداوة
يسلخ منا توب الرحمة
ونار القلب تزيد قساوة
حسرة قلبي عليك يا بهية
بقيتي للباشاوات تسلية
يسرقوا منك زهر شبابك
كأنك ورث ابوه وتكية
تجار غش عايزين يبيعونا
زي حيتان وبيفترسونا
والأراجوز واقف يتنطط
يملا جيبه بدم أبونا
كل أحلامنا معاك ماتت
والأفراح دي موضة وفاتت
بنترحم على أيام عدت
ونتمنى نلاقيها عادت
كانت الأرض سنابل خير
نملى صوامع ندي الغير
والكل يتمنى رضاك
وواقفين قدامك توابير
بقي الحلم نلاقي رغيف
متحاش نصه خفيف ونحيف
يسد فينا رمق الجوع
فيرفعوا ايدهم للتخويف
خدنا منك يعني ايه
واللا فاضل فيك ايه
فاضل ايه غير الكفن
ويمكن وقتها ما هنلاقيه
عارف أن دا غصب عنك
عمر القسوة ما تطلع منك
هي خية اتنصبت ليك
لاجل ما تركعي للي يضنك
بس هصبر وارضا بجرحي
مهما اتغير شكل ملامحي
أصل مليش غيرك يا بهية
ما أنت حلالي وبسمة فرحي
عمري ما هقدر مرة أخونك
وارضا بدمعة جوه عيونك
هدفع مهرك روحي وعمري
وبدمي هحميك وأصونك
*************************
بقلم / مصطفى كرم
خاص بالنصوص المميزة
D. Hodaaabdo 
أضف تعليق