كلمتني
كلمتني عن الغرام
وإزاى تعشق روح بسلام
إزاى تسكن قلب يحبك
وتلقى معاه كل الأحلام
كلمتني كلام كتيييييير
كنت بهمسه بدوب وأغير
وأصبح زي شعاع النور
يفرح ديما قلب الطير
سمعتني أحلي كلام
عشت معاها أحلي أيام
كنت أتمنى الحلم يطول
وتفضل هي حنين ووئام
لكن ليل البعد اهو بأن
يمحي الحب وكل حنان
يغطي بلونه ضي النور
ويحل معاه ضباب وظلام
تبقي القسوة مكان حنية
ووصل القرب يبقي بلية
وجنة حبه في لحظة تبان
نار وبتكوي بكل قاسية
فين الهوى فين الأحساس
ضاعوا في لحظة بسرعة يا ناس
وكل كلامها عن الأشواق
وهم وحلم ما له أساس
كل كلامها طلع شعارات
بتقوله يا ناس ف السهرات
تلم كل الناس حواليها
يستمتعوا كدا بالعبارات
اللي يهتف ويقول الله
واللي يقول دا انا بتمناه
واللي يقول ياريتني مكانه
وهو لا داري وجع الآه
ولما قولت فين الإخلاص
باقي عندك واللا خلاص
ردت بكل غرور وتكبر
انسى يا قلبي دا كلام برصاص
امسح كل حروف الهوى
وأن حروفنا عشقت سوا
امحي كل لحظة صفا
دا كان حلم وضاع ف الهوا
قولت والله براڤو عليك
بعد ما كنت بعيش لياليك
وأحلم إني أكون وياك
كرهت حتى النظرة إليك
هبعد عنك وأنسى صحيح
وأعيش العمر واضح وصريح
ومهما أشتقت لنظرة عينك
هفكر نفسي بقلب جريح
وأقفل بعدك باب القلب
وأكتب فوقه ممنوع الحب
أصل الحب كلام أوهام
لناس تتسلى ووخداها لعب
_______________________________
_______________________________
بقلم الشاعر / مصطفى كرم
خاص بالنصوص المميزة
D. Hodaaabdo 
أضف تعليق