*** دم رخيص ***
أيوه يا أمه جاي خلاص
راكب قطري وكلي حماس
وفيت يامه حق بلادي
وجاي لفرحي ويا الناس
أعزمي يامه كل أحبابي
وادعي قرايبي وأصحابي
حتى إن كان فيه بينا خلاف
صالحيه دغري وبلاها عتابي
عايز الكل يفرح ويانا
وتبقى الفرحة مش سيعانا
ونعيش يامه همه يومين
خلينا ننسي مر شقانا
فجأة علا صوت الصوات
وناس بتجري في الطرقات
زحمة كتيرة والكل بيهرب
قطرين صدموا ومئات أموات
ااااااه
الحقي يامه طفل وليدك
شكله مفارق هيسيب إيدك
ويروح جنة رب الكون
ابقي ادعيله دا هو شهيدك
وإياك تقبلي منهم دية
أو كلمات معسولة هنية
يظهروا بيها في القنوات
كفاية بقى شعارات وردية
زهر شبابنا بأيديهم راح
وكان بغلطهم هو ضحية
دمنا ليهم سعره رخيص
يقابلوه ديما بالتهجيص
وكام ملطوش تمن الموت
وحقنا يبقى راح فطيس
ونعيد الكره ييجي مية مرة
ندوق الذل وأيام مرة
واللي قتلنا وكان الجاني
سكران طبعا شارب خمرة
قولولنا بس نحاسب مين
لو فاكرينا بني آدمين
نفسنا مرة نحس قيمتنا
وحقنا نأخده من الظالمين
**************************
بقلم / مصطفى كرم
خاص بالنصوص المميزة
D. Hodaaabdo 
أضف تعليق