*** اللي غاوي ***
اللي غاوى يكون معاك

واللي حبه ليك أصيل

ميهموش تغيب ساعات

أو سماكم يطولها ليل

أصل الحب دا تسامح

مهما كان الفعل جارح

هينسى مره بفرح طارح

وإيد ممدودة ليك تصافح

اللي غاوى يكون معاك

يوهب كل العمر عشانك

ينسى نفسه وايه يناسبه

وتفضل أنت ساكن مكانك

زي بستاني الجنينة

يروي زرعه حبه حبه

والفرح يملا عينيه

لما يطرح زرعه حبه

دا اللي غاوي يكون معاك

واللي حلمه ينول رضاك

شمعة طول العمر قايدة

عين سهرانة تحرس خطاك

إيد تساعد ليك وتبني

بكلمة حلوة منه بتغني

فتعلى بيه وتنول مرادك

وثمر الحب ليه هتجني

دا اللي غاوي يكون معاك

هيلغي كلمة الكرامة

مش ع أي كلمة يغضب

يقول كرامتي يزيد ملامة

أصل الحب دايما مبني

ع التفاهم والشهامة

واللي يسعد قلب حبيبه

هيلاقي الحب مع ابتسامة

★★★★★★★★★★★★

بقلم / مصطفى كرم