*** وهم الحرمان ***
الحب والشوق والحنين

دول سلاح المحرومين

أوعى يوم تسمع نداهم

هتلاقي قلبك نبضه حزين

تبتدي بينكو الحكاية

بكلمة جميلة من حرفين

وتكبر جواك الأماني

أنك تعشق نظرة عين

تشكي ليك كل همومها

وإزاي قاست مر سنين

ويا ناس كانوا نصيبها

كل مناها يكونوا راضيين

زي شمعة تضحي بروحها

وهم بيها مش حاسين

تغزل ليهم توب الفرحة

وهم لحقها مهملين

نفسها تسمع كلمة حب

زي باقي البني آدمين

فتحس قلبك مال إليها

وسكنت قلبك ف دقيقتين

ويبدأ بينكم همس الشوق

وإحساس حب بيه شاردين

تبنوا قصوركم م الخيال

وتعيشوا فيها دور العاشقين

وأن الدنيا صبحت جنة

بتعزف غنوة للحبيبين

فجأة تلاقي دا كله سراب

وكأنك عايش حلم لعين

سامحني حبيبي غصب عني

مقدرش أكون م الخائنين

هبعد عنك وأرضى عذابي

ويفضل حبك بين ضلعين

يمكن نتعب م الفراق

بس نصيبنا وله صابرين

وأنت بكل سذاجة تصدق

عشان ترضي قلب سجين

وترضى لنفسك بالآلام

وجرح قلوب ديما بايعين

يسرقوا منك لحظة نشوة

يعوضوا بيها حرمان وحنين

ولما تشبعوا من حنانك

تلاقيهم صبحوا ناس تانيين

فوق يا غارق في الأوهام

وبلاش تعشق حلم حزين

وأقفل قلبك في وش الهوى

ولا تكون لعبة لغدارين

**************************

بقلم / مصطفى كرم