خلاص جبرت وسوق العشم فضوه وملعون ابو القلب اللي ممكن يتعشم لأن عشم مات

*** عشم مات ***

سوق العشم فضوه

ولا باقي حاجة فيه

أصل العشم ممنوع

في زمن كترت بلاويه

لا قلب مخلص يحبك

ولا حتى حنان تلاقيه

دا الغدر فارد جناحه

ملفوف بسواد مداريه

يسرق م الشمس نورها

وبتوب الخوف يداريه

وأنت اللي فاتح قلبك

والدفا معشش فيه

ما نابه من طيبتك إلا

خيبة تزيد مآسيه

فاكر أن الدنيا جنة

وملايكة عايشة عليه

تفتح للكل حضنك

وتغني عشان تواسيه

فجأة تشوف حقيقته

تعبان وسمه ماليه

والغنوة اللي كانت بلسم

حولها نواح يشجيه

كل أما تصرخ ااااااااه

يزيد جرحك نار تكويه

متعشم يرق لحالك

ويداوي جرحك بأيديه

ويقولك معلش سامحني

وتشوف دمعه جوه عنيه

لكن ظنك ديما خايب

لما تشوف قسوة معانيه

نفسك نفسك أوعى تصدق

صاحب كان تتونس بيه

واللا أخ شقيق من دمك

تضحى بعمرك عشان تحميه

حتى فرع طالع من صلبك

وقت الشيبة ما هتلاقيه

كله ساعتها يقول معلهشي

حافى علي قدي أزاى أديه

المتعشم ف حبال دايبة

موج البحر هيغطيه

أصل عشم مات في التوهه

وجوه كفن لازم تواريه

وقتها تسمع صوت العقل

فهمنا الدرس بكل ما فيه

خلاص يا دنيا آمنا پأن

مفيش عشم تاني نبديه

وملعون فيك القلب الأبيض

لو فكر يتعشم فيه

*************************

بقلم/ مصطفى كرم