★★★ سرداب الوجع ★★★

تملي عايش بسردابك

ممنوع اشوف أنا بابك

أو تلمس رجلي أعتابك

وكأني في رباك هجين

اشوف النور شعاع مكسور

ومتحني بليل مبدور

بيكسي كل أركاني

ولحن الفرح ليا حزين

انا منك ومن نبتك

لا زرع شيطاني جاب أرضك

وعايش راضي بقساوتك

ومنايا فيك قلب يلين

يمر العمر قدامي

مسروقة مني أيامي

مسكوك الفرح بألامي

قتلاه جوايا وهو جنين

يقولوا الأم حضن أمان

ونبع حقيقي كله حنان

ووقت الشدة دورها يبان

فازاي حضنك ليا أنين

قولي لي إن كنت كرهاني

وناكرة جذوري وكياني

ورامية همومي بيعاني

أشوف غيرك عيون تانين

أنا عايش حلاوة روح

وصوتي م الصراخ مبحوح

ومهما أغني واللا أنوح

تملى صوتي فيك سجين

★★★★★★★★★★★★

بقلم / مصطفى كرم