*** مات الكلام ***
مات الكلام فوق الشفايف
والنبض جوه القلب خايف
تنزل دمعة ع اللي خان
وساب لقلبي حزن جارف
مستني تسمع مني إيه
وقلبي أنت جنيت عليه
لما قولت أنسي اللى كان
طريقنا شوك ومشينا فيه
بسهولة بعت حبي ليك
نسيت شوقي وغيرتي عليك
بعت ليه كل الأحلام
حتى العشرة ما تمرت فيك
بيع أكتر وزيد حرمان
أصلك خاين ملكش أمان
كنت قمر ينور ليلك
وأنت نار تحرق بستان
داري حروفك مش قادر أشوفك
دا دمي فيها …. مالي كفوفك
تكتب كلام …….. حب وغرام
أتاريك بتغدر …وتبدي خوفك
بس خلاص قلبي أهو فاق
مش هيصدق تاني نفاق
وحروف خاينة بتلهي عقول
وآخر السكة تلاقي فراق
من النهاردة وداع وأنين
لقلب عشقته طول السنين
هبعد عنه وأدوس على قلبي
ويفضل جرحي فيا سجين
وأفتح لنفسي طاقة نور
تكون بيني وبينك سور
أصل الليل ما يلاقي نهار
ولا يجمع بينهم كتاب مسطور
ولو رجعت طالب السماح
وتقول تعالى ننسى اللى راح
هقولك والله كان على عيني
جرب ودوق طعم الجراح
***********************
بقلم / مصطفى كرم
خاص بالنصوص المميزة
D. Hodaaabdo 
أضف تعليق