تمني كام

كلمات ……. أيمن البكري

كل ما نتكسر
نلوم على الزمن
ونعتب على الأيام
الكل فى الأخر خسر
ومن غير إنذار
اتهدت كل الأحلام
وبقينا سلعة فى سوق
وكل واحد ليه ثمن
وكل واحد فينا بيسأل
أنا تمني كام

وعجيبة يا دنيا عجيبة
مبقاش فيك
إخلاص ولا طيبة
ولا بقى ناس عندها إحساس
ولا ناس بتخاف من العيبة
إل عايشين والحبيبة
وإل كل يوم فى مصيبة
وإل مالهمش أساس
عايشينها بلاش في بلاش
ولسه يا ما هنشوف
في دنيا غريبة

وأدي إل أنت حبيتها
بتستغل ضعفك قدامها
بتطلب منك المستحيل
وتقولك إن دي أحلامها
بتغلط فيك وبتهينك
ولو جيت تعاتبها
بتبدل المعنى في كلامها
وإنت شايل همها
وكل همك تكون راضية
وهى بتحكم وتتحكم
وعملالك ولا القاضية
في وقت الشدة تلاقيك جنبها
ولما أنت تحتاجلها
تقولك آسفة مش فاضية

وأدي بنت كانت
الدنيا عليها قاسية
بتبيع نفسها
والثمن ولا يسوي
ولو سألتها بتعملي كده ليه
هتقولك
هى دي السلعة إل ماشية
بقى هي دي السلعة إل ماشية

وأدي تجار أعضاء
بيبيعوا فى لحم الناس
لا ضمير ولا وفاء
ولا ريحة الإحساس
بيحصل ليه كده
وإزاي الدنيا دي تتعاش

مفيش حاجة بقت فارقة
بقينا خلاص سلعة
وكل حاجة فينا بتتباع
هنا للبيع ضمير ميت
وناس ب الشر تتصيت
والطيبة والحب والإخلاص
بقت حاجات تافهة
ومحدش عايزها ولو ببلاش