المقهي
…..
ناصر النادي
……….
وعدى العمر قدامي ماحستهوش
وانا قاعد على القهوه
وحاطط رجلي على رجلي
وصاحب القهوه بيقولي هتشرب إيه
هشرب شيشه يامعلم
وفنجان شاى
وسيبني شويه أتألم
على العمر اللي عدى إزاى
وليه الشيشه قدامي بتعزف ناى
وطعم الشاى بقا مش شاى
بقولك ايه ماتعرفشي
طبيب طيب
يكون إنسان وحلو معاى
طب سيبني شويه أتفرج
على الرايحين والجايين
على البناطيل والفساتين
على الناس اللي رايحه
الشغل تاكل عيش
على الولد اللي دخل الجيش
على البنت اللي شايفه الحلم
بيسرسب فرس وعريس
على الشحات بيتفنن
على النصاب بيتبغدد
وجنبه حرامي بيقاسمه
ومااختلفوش
وعدى العمر قدامي
ماحستهوش.
خاص بالنصوص المميزة
D. Hodaaabdo 
أضف تعليق