وأديني لسه عايش
وبتفرج علي الدنيا
لا انا قادر اتغير
ولا قادر حياتي اغير
عاجز. عايش بس
مش عايش
متسجل ضمن الأحياء
مختفي بعيد
عن الأضواء
ولاحد داري
ولا حد شايف
تصدقوا
إني بقيت خايف
أموت بينكم
ومتحسوش
أنا عايش
علي أمل إن
بكرة جي
شايل علي كفوفه
الفرح والضي
جوايا عتمة
مستنية نور
جوايا ثوره
عايزة حد جسور
ينفض تراب الوجع
ويشيل من قفل الحياة
الصدي.
ولو معرفش يفتح
ينط من فوق السور
مش بقولكم.
عايزة حد جسور
أنا عايش ومستني
شمس بكرة الجاي
وجايب معاه الناي
وحبيب للقلب صادق
وشجرة خضرة
وكوبايتين شاي
أنا عايش يادنيا
رضيتي والا مارضيتي
اعرضي كل اللي عندك
وهاتي كل مافيكي
علي خيرك
هاحمد ربي
علي شرك
أنا راضي بيكي
قولي زي ماتقولي
وكوني زي ماتكوني
ماهيش فارقة
اللي شفته منك كتير
وانا جواك يادنيا
بقيت أسير
مستني.
الفدية تدفع
من دمي
وبكرة جي
وهاتحرر
وشمسي بكرة هتنور
عتمتي.
وهاطلع لساني
واغيظك.
وأقول انتصرت
علي دنيتي
أنا عايش
رويدا عبد الحي
خاص بالنصوص المميزة
D. Hodaaabdo 
أضف تعليق