ارجع يا حبيبي رايح على فين
دانا دُبت حِنيّه
بتقوللي هاغيب بس دقيقتين
والله ولا ثانيه
او اعِد لحد ما اقول عشرين
على عيني يا عنيا
إن غبت ثواني يا ضي العين
ما بعيشي ف الدنيا
دانا ببقى ف غربه تملي حزين
والفرحه مطويه
دي الثانيه ف بعدك تسوى سنين
ودقيقة دي بميه
دانت بتوحشني ف غمضه عين
لو غمضتها شويه
ده منايا حبيبي تبات ف العين
تبقى النظر ليا
وليلاتي انام على صورة الزين
منقوشه ف عنيا
إن غبت حياتي عايشها انين
ودموعي سيل ميه
مِلك لأحزاني لجرحي اسير
والآه نار فيا
وظنوني بعقلي تودي تجيب
والراحه منسيه
وماليش ف البعد غير التنهيد
جمر وقايد فيا
وتقوللي هاغيب بس دقيقتين
وكأنها شويه
خد قلبي معاك لو رحت لفين
خد روحي وعنيا
بقلمي/ خالد جمال ٢٧/١٢/٢٠٢٣
خاص بالنصوص المميزة
D. Hodaaabdo 
أضف تعليق