يا قلبي انساه سنين وياه
وهوه بيأسى وبيجرح
عايش تهواه تقول الآه
وقلبه سامعها وبيفرح
دي لأ ماتجيش ماتتعبنيش
وسيبله الدنيا والمطرح
سايق ف العند وليا الضد
لو اجمع هوه ليه بيطرح
ف نِفسي يسد لو ابني يهد
مراره ف قلبي نار تلفح
مشاعره جمود حجر جلمود
لا بيسامح ولا بيصفح
سنين بتفوت عايشها سكوت
وشجر المر فيك يطرح
تملي حزين ودمع العين
بيكوي الخد ويجرَّح
طواك نسيان ومش دريان
من الاحزان بتطوَّح
ليه كل يومين تجيلي منهار
ودمعك في العيون انهار
ولا بتهدى ف ليل ونهار
وجرحك نصل فيك يدبح
بتزرع شوق وتجني آلام
تآسي الليل وهوه ينام
عايش ف الغفله والأوهام
وعمرك من ايديك يسرح
ما تنسى الدمع والتنهيد
وحب من اول وجديد
ده بكره اكيد جايب تغريد
ونوحة النبض هتروَّح
يجيلك يوم وتنسى الآه
يا قلبي انساه
بقلمي/ خالد جمال ١٧/١/٢٠٢٤
خاص بالنصوص المميزة
D. Hodaaabdo 
أضف تعليق