وادى حال الدنيا .
ياعم زمان بحن اليك
لأيامك ولياليك وناسك الحلوه وحكاويك
بحن للمه والصحبه وبيتنا القديم
والطبليه والنمليه والقاعده على الحصيره
وطبق العسل والطحينه
وستى وجدى وابويا وامى
وطبق الرز الكبير
ياكل منه الصغير والكبير
كنا بنحب بعض وتخاف على بعض
فين الجيران بتوع زمان
كانت امى لما تعمل بصاره
تبعت طبق للجيران
يرجع مليان
بشوية بلح أو بشويه لقمة القاضي
يعنى مايرجعش فاضى
ياعم زمان بحن اليك
هو جرى ايه للناس
دلوقتى الغلبان بالجزم بينداس
القلوب بقت حجر ليه يابشر
والله الواحد مهما كبر
ما يعيب على الزمن
العيب فينا احنا يابشر
وتبص تلاقى واحد ماشى مبسوط
والتانى ماشى زعلان
وواحد غنى وواحد فقير غلبان
وواحد مش لاقى اللقمه
وناس بتاكل اشكال والوان
والغنى بيحسد الفقير على صحته
والفقير بيحسد الغنى على ماله
ماحدش له دعوه بحد
وهى ايام وبتعدى
زى السبت والحد وان جيت للجد
الإنسان بطبعه انانى
مابيحبش إلا نفسه وبس
طب اسمع الكلمتين دول وبس
لأ الصحه دايمه ولا المال دايم
الطيب هو اللى دايم
وسبحان الواحد الدايم
وادى حال الدنيا
نبيل المصرى
خاص بالنصوص المميزة
D. Hodaaabdo 
أضف تعليق