عم سعيد……مش سعيد
ماشى فى الشارع يكلم نفسه
مشيت وراه….
سمعته بيقول. ٱه
راح على القهوه وقعد
صباح الخير ياعم سعيد ..ده القهوجى
اجيب لك قهوتك الزياده.
لأ ياسيدى اعملها ساده
آه نسيت لامؤاخذه
النهارده اول الشهر
ايوه ياسيدى ماهو يوم فقر
استغفر الله العظيم
الصبر يارب الصبر
أسترها معانا يارب
عم سعيد شافنى ونده عليه
تعالى ياسيدى احسب لى حسبة كل شهر
بس الشهر ده زود عليهم قسط الصينى بتاع البت.
وكمان قسط الزفت اللى بيقولوا عليه النت
عم سعيد ولع سيجاره
بص لى وقال ياخساره
ياخساره كان زمان اللى عنده تلفون
يبقى من الأعيان
دلوقتى بص كده حواليك
كل واحد ماسك له تلفون
وهات يا كلام على القاضى وعلى المليان
ده حتى فى البيت
الواد والبت وحتى امهم
هيجبولى جنان
وادفع ياسعيد فواتير
وتيجى تتكلم يقولوا انت دقه قديمه
يابابا هات لك تلفون انت كمان
منين ياحسره
هاته بالتقسيط من صاحبك عم معيط
كمان….
هو القبض مكفى ايه ولا ايه
تلفون القهوه رن…
الواد القهوجى ..
كلم البيت ياعم سعيد
الو …
ايوه ياستى انا جاى
قبضت ايوه اتهببت
طب وانت جاى هات لنا فرختين
وهات فاكهه
خطيب البت بطه معزوم عندنا النهارده
ماتنساش…
عم سعيد وقع على الأرض
عم سعيد فى الانعاش

نبيل المصرى