….جداول وسنابل
اناالمزارع عشقت الحرث والمخرش
لااعرف سياسةولاادري مايسوي بوش
غيرانه اغتربالقوات واتوحش
على المساكين والطفل اقتلب طاهوش
دام السياسة تآمر والصداقة غش
الكذب فيهامهيمن والحياء مخدوش
فالسكته اجمل وخلي السترلايفتش
(لاافتش مغطى ولااغطي علي مفتوش)
لاافتح مواقع ولاادشدش مع من دش
انام بدري ابكر للحقول غبشوش
مع النسيم المعطرللنفوس انعش
والطيرزاجل وبالطل الورق مرشوش
رضاك والقلب راضي والرضامطرش
.البال مرتاح رايق والامل منعوش
شمرذراعه .الى فوق الركب حممش
والارض ماحبت الازارعي محموش
تطرب حقوله أهازيجه وهو بنغش
ومن جبينه لآ لئ نازله وقروش
وان شب صوته على المحراث ثوره وش
طرب ونشوة وظهره حرك الطربوش
وشجرة العلب توسدظلهاوفرش
راحة جنوبه وديباج الهدوو مفروش
الطيرعلى غصنهاالهدال باض وعش
بنامن العشب فلة فاكهة خردوش (1)
تهزها. النود ترعشها ولاتغتش
جدران متماسكه وعمودهامرعوش
مع الولدوالبنيةتحتهادردش
ياعون باباوياقرة عيون أبوش
واقبل بزاده كحيل الطرف ومنعنش
صدره مزركش نمانم زاهيه ونقوش
رد التحية وياقووى بهاكشكش
ذوقه عسل والغداءبين العسل مهموش
أجمل من البيض بنان الكف ذي قررش
واحلى من الحلو لمسة كفه المنقوش
لموا على خير وجبة والهنا مفرش
الناشف اطعم من المحشي والمحشوش
والزين بين العلف شال الشريم وحش (2)
لووركس تلوي عقاربها الحقول وتحوش
سنقل منعم قوي وقزاز ضد الخدش
اصلي من الله والمينارعليه رموش
متقاسمين الحياة نعمل ونتناقش
نزرع ونحصدوسوى شركة بدون رتوش
ماهي دعايات من بحقوقهااتحرش
صلط على العقل معول والجسدشاقوش
ودع بذوره ولله في دعاه. أجهش
اصلح لناالزرع واقبل ليله المغطوش
والزرع نبته من ارحامه بدى وافتش
مولودليلة ويومين لابس القرقوش
يارب. ديم المطر للزرع لايعطش
لابمبه اسقيه ولاحابش ولامنبوش
انا من الطين وافرح بالمطر لا…رش
وان غابت امزانه امسى خاطري مربوش
مااحلى الحقول راوية وجبال تتروش
بامزان شنت غدق تروي ضمأ المعطوش
والسيل ظهره محمل بالزبدوالقش
حنش مرنقش خرج من جلده المقروش
وكل غصن ابتسم بعدالمطروابتش
فرحت من فرحته سميته البشبوش
والزرع باحضان حقله شب واتنعنش
بوجه مشرق طفوله بالجمال بشوش
صف الطوابيرصبايا عمرها اربعتش
فستانهاسندس اخضروالجعود بتنوش
ان هبت النود تتمايل وتتناوش
ذي مايحب الدلال في الزين ماحبوش
وبالسنابل بدت للعرس تتنقش
عرس الحصاد حان وصبحه طل ياعلوش
صلوعلى الهاشمي آلاف عدالطش
ذي مايصلي على احمدبالظلام موحوش
بقلمي/ علي جملان@@ ٢٠٠٥
خاص بالنصوص المميزة
D. Hodaaabdo 
أضف تعليق