ا
(يا مذبلي عيونك) .. للشاعر الدكتور علي مسلم عجمي
————————
شبكنا الأيادي و قلب بالحب انكوى
و سرنا سوى و الشوق أعطانا قِوى
عِشِقنا إلهام عشق المغرمين
التاريخ عنا قصص غَرَّدها و روى
و لليوم نحنا في سجل العاشقين
وحدو هوانا صدى إخلاصو ضَوى
درب المحبة مش ورد… فيها أنين
و آهات مع غِيرة بأعلا مستوى
يا مذبلي عيونك على قلبي الحزين
قلبي عند ما شاف عينيكي هوى
لا تجهلي اللي حبك من سنين مين
حبك بقلبي و في بصابيصي انطوى
ساعة قسى و ساعة مع المحبوب لين
مش عارفة تحطي على العلة الدوا
لوما شعوري يدفعوني للحنين
كنت بشكيكي إلى قاضي الهوى
لكن منعني حبك بحكمة و يقين
إنسى طناشك كل ما لاح الهوا
نجوم السما و القمر كلهم عارفين
و الأرض كلها و كل شي فيها انطوى
و العشق و العشاق بحلفلك يمين
و معهم بلابل صوتها الشاجي حوى
و الورد و الجوري و عطر الياسمين
و السمر و السمّار كلتهم سوى
بيعرفوا إني و عليي شاهدين
وحدك بقلبي و غير حبك ما أوى
و بكرا عند ما صير في قبري دفين
و تتحطم الآمال في سر النوى
بدفن معي حبك متل كنز الثمين
و بقول في عندي أمل برجع بعيش
بكسِّر بلاط القبر و منرجع سوى
خاص بالنصوص المميزة
D. Hodaaabdo 
أضف تعليق