زجل
أف
ناس مكبوتة وناس زعلانة عايزين نسمع أخبار حلوة
تمشي تشوف الناس زهقانة نفس الهم ونفس الغنوة
حتي الروح محتارة معانا لا نافع فيها سيجارة أو قهوة
فترة طويلة العيد ما جانا ولا سعادة تيجينا علي سهوة
دنيا غريبة ومش سامعانا وأحوال صعبة برة وجوة
عايز أصرخ وأقول آه يانا وأبوح بيها وأقولها بقوة
تفتح شاشة تلاقي إبادة وحروب دايرة هنا وهناك
وخوف الناس أصبح عادة حتي الضحكة بقت واحشاك
ونشوف أخبار وحشة زيادة إيه آخرتها يا هم معاك
هي الدنيا ما فيها سعادة مكتوب يجري الحزن وراك
أزمات ترحل تيجي أزمات ومشاكل ليل ويا نهار
ونقول يمكن هم وفات وبكرة الفرحة تعم الدار
نصبح يومها نلاقي أهات وهجوم داير بلا أعذار
نفسنا حلم نشوفه ساعات فرحة في رؤية وحزننا غار. آه ياني أف
بقلم شريف شحاته مصر
خاص بالنصوص المميزة
D. Hodaaabdo 
أضف تعليق