اليوم رقم ٢٣٤٥٦
( حوارية نثر ايقاعية بالمحكية المصرية إبداع حر )
بقلم..مرقص إقلاديوس
………
لو كان للواحد فينا عمرين.
تفتكر إللي ضيع عمره هدر،
كان هيصون التاني
ولا هيضيع الإتنين.
أصل إحنا لينا أعمار كتيرة.
عمر عمرنا ما كان وحيد.
كل يوم بالليل بنموت
ومع الفجر
بنصحى على عمر جديد.
يا ترى بتضيعه
يا عمنا السعيد
وبتبقى الخسارة خسارتين.
أراهنكم
إن إللي أنا قلته
كل واحد عارفه منكم.
إنما
سايبين العمر
يجري بعيد عنكم.
مشغولين باللقمة،
مشغولين بالهدمة.
مع إن سنبلة القمح
ربنا ملبسها توب دهبي.
وأي عصفور على الشجر
بيرَٓوح شبعان بيغني.
بس إحنا ما بنفهمش غناه.
وهوا بيقول
أشكرك يا ربي.
طب هقول لك
إنوي والنية لله
تِنجي شوية
من الأيام إللي جاية.
يا صاحبي
الحياة هتخلص
مش هتفضل لك هِيا هِيا.
يا رب نجينا.
يا رب قوينا.
نعيش نرضيك
الكام عمر
إللي باقيين لينا..
يالا ..كل يوم
وإنتم طيبين.
…….
ملاح بحور الحكمة
مرقص إقلاديوس