*** شهريار المكار ***
الخيانة ليها ناسها
مهما تلبس من وشوش
مهما طال زواق جمالها
هتبان يوم من غير رتوش
احنا بس الطيبة فينا
نقول عمره ما هيؤذينا
أصل النية جوانا خير
ما نفرض سوء ف اللي شارينا
شايفين بسمة بوجه ملاك
ونظرة تقول أنا بتمناك
همسه يدوب قلب الصخر
يقولي عمري أنا كله فداك
كلامه سحر ولا ف الأفلام
تعيش وياه أشواق وغرام
تحس الدنيا صبحت جنة
ونلت معاه كل الأحلام
قلت الله على قلب يصون
كله براءة وحضن حنون
سكن القلب وفيه أتربع
وحسيت جنبه ملكت الكون
حبيته آه أكتر من نفسي
كان ليا نبضي وكان همسي
كان بحر واسع وحنون
على شطه كان قلبي بيرسي
يوم ورا يوم كتر الغياب
ومش طايق مني العتاب
والبحر الدافي لقيته اتغير
موج قلاب وكله ضباب
أسمع عنه حكاوي مرار
وكأنه يا ناس شهريار
كل ليلة قلب يوده
وأخر الليلة عذاب ودمار
ولما عينه جت في عنيا
ومش قادر يرفعها شويه
شوفت ديب مسعور قدامي
والحنان في عيونه قسية
قولت فعلا الخيانة ليها ناسها
مهما تلبس من وشوش
مهما طال زواق جمالها
هتبان يوم من غير رتوش
********************
بقلم / مصطفى كرم
خاص بالنصوص المميزة
D. Hodaaabdo 
أضف تعليق