**** عقول مكبلة ****
أنا اللي ببحث
ع الحقيقة ف السراب
أنا اللي الكل ساقيني
كاس العذاب
راضي أنا بيومي
وكاتم حزني وهمومي
وأقول اصبر ع الظالم
مسيره يتعدل يومي
سقوني كاس العولمة
خلوني أبقى أمعة
لا عارف بكرا من أمسي
وعايش جوه صومعة
قافلين عليا طاقة نور
بانيين بيني وبينهم سور
لا أنا فاهم ولا عارف
وراضى لنفسي أعيش الدور
أسمع كلامهم أقول تمام
وأنفذ طلبهم من غير كلام
ألغي عقلي ولا أفكر بيه
وأفكر ليه وأنا عندهم
أنعام
عقولنا مربوطة بحبل متين
جهل وتحزب وفكر مهين
ولو فكرنا نفك الحبل
نشيل فوق دماغنا الطين
تجويع وذل ولقمة بمهانة
وحظر اقتصادي لدولة تعبانة
أو نتصنف دولة عدوانة
ولو فكرنا يوم في مصيرنا
في نظرهم تبقى جريمة وخيانة
أكتب وقول يا قلم فهم كل الناس
العقل هو الجوهر وبيه الناس تتقاس
وعشان نشوف شعاع النور
نخلي العلم لينا أساس
******************************
بقلم / مصطفى كرم
خاص بالنصوص المميزة
D. Hodaaabdo 
أضف تعليق