*** بينا ايه***
محتار والحيرة وخداني
وسارقة م الجفون نومي
أقولك انت في وجداني
واللا أداري ف قلبي لهمومي
غلبني الشوق وزاد حبه
بيحكي حنينه لأحبه
على المحكي يقول أصحاب
وجوه النبض روح حابه
بعاهد نفسي قدامي
تصون السر ف كلامي
ولو حبت تبوح بالسر
هتلاقي صمتي دا لجامي
ولجام الحر في لسانه
يصونه يعلي في مكانه
ولو فك يوم واتحل
ما يجرح ورد أغصانه
هسيب حكايتنا للأيام
تخليها حنين وغرام
او اتنين نشأ بينهم
صداقة تدوم مع احترام
ويفضل جوه منا الشوق
في صمت لحلاوته ندوق
ونتمنا لقانا يدوم
يطير بينا ونعلى لفوق
فننسى العيون والناس
ويكفينا جمال احساس
ولا يهم اللي بينا ايه
كفاية نكون سوا وخلاص
*************************
بقلم / مصطفى كرم
اترك تعليقًا