شكراً يارب
أول هدايا الصبر
جبر لقلب داب
أول هدايا الصبر
فرحه لعمر شاب
أشوف حروفها والكلام
أنسى الألام وأرجع شباب
كلامها بيداوي الجراح
يطرح براح..في القلب
من بعد الخراب
قلبي اللي راجع م الغياب
نسي السهر..نسي العذاب
وشاف جمال الحلم
من بعد السراب..
أه  لما صوتها يصبحك
وتلاقي حاجه تفرحك..
تحس دفء الطبطبه
من ايد بعيده .. قريبه
أشوف حروفك والكلام
أنسى الملام
واقول لديك الفجر
قوم أدن أوام..
عشان نسبح ربنا
قبل ما نتوه في الزحام
من قلبي اللي اشتاق لها
ابعت لها..
اجمل تحيه والسلام
علي أحلى كلمه وأحلى صوت
واللي بدون ما اسمع لها
قلبي يموت..
يرجع يعشش ع القليب العنكبوت
يرضيكي أنا ..قلبي يموت ؟؟
يرضيكي أنا..
قلبي اللي بيحبك..يموت؟ ؟
….      ……
شعر/نصر سيد بدر ..القاهره