انا الضاحك
وأنا الباكي
وأنا المغلوب
علي أمره
أنا القادر وأنا العاجز
وأنا اللي سياط البعاد
الهبت ظهره
ومزقت أوتار فكره
أنا اللي دمعه سايل
يروي بساتين وخمايل
أنا العمر اللي راح بدري
أنا الفجر اللي جاي يجري
وكان أملي نوره يضوي
بس انطفا بدري
أنا البائس وأنا اليائس
وأنا اللي طيورقلبي
بتصرخ صرخة مكتومه
بدمعه أم مكلومة
علي ضناها اللي راح بدري
أنا اللي مسافر
الهارب من الأيام
اللي شارب سم
مراره علقم
خلي تاريخي اللي ورا
بقي قدام
أنا أمبارح وأنا بكرة
وأنا اللي عايش علي ذكري
تفوت قدامي وانا واقف
تكتفي حكايتها وأنا خايف
مغمض عيني مش شايف
لها أول ولا عارف
هتخلص أمتي لحظاتها
طب أقولكم سر
أنا مش عارف الفرق
بين أيام العمر
كلها شبه بعضها
باهته بألوانها
علي بحر موجه عالي
كان حنين. قلب فجأة
بقي غدار
أنا تعبت من التكرار
والحصيلة في الأخر
حبة أصفار
من غير واحد
يديهم قيمه ومكانة
حقيقي بجد
ده وصف صريح
لنفسي.. بكل
صدق وأمانة
رويدا عبد الحي