عم ياصياد (625)
……………
عم يا صياد
إزاي الشبك يتلم
رميت في البحر حالي
يمكن فى الشبك إتلم
هتلاقي نصه كسور
والباقي دايب من الوجع يا عم
ضحكت عليه دنيته شال منها فوق
الهموم كام هم
غدروا بيه وضيعوه
طابور إخوه
وصفين صحاب
هيئوله النار دي جنه ودماغه واصله للسحاب
هادوه بحشوه من الكيف في بافره
من بركه طالع نازل
في حفره
ويوماتي إدفع لفك شفره
والجيب ومايل
ع الفجر داير
ورا دنيا عيره
مع كل يوم تلبس له وش
ساعات بتضحك
وساعات تغش
وساعه تبيعك ما تسوا قرش
يا عم يا اللي بتصيد تماللي
خد كلمه مني بحكم إني
ضاع مني حالي
الصحبه ساحبه وقلوبها جاحده
ناكرين دموعي جمر فى ضلوعي
على شوك خطاهم
ماشي وراهم
مش لاقي نفسي تاهت معاهم
على كيف مزاج
أصنام قزاز جرسه وفضيحه
دخان وريحه وحضور غياب
بقلم .. صبري رسلان