اد إيه غالي التراب

ليه ع الرخيص بنضرب مثلنا
ونقول برُخص التراب

ده منه جينا ويوم وفاتنا
بنبقى تحت التراب

كل الرُفات بتدوب وتفنى
واخِرنا حِفنة تراب

حتى اللي غايب عن بلدنا
ف يوم وصالنا
بيميل يبوس التراب

اد إيه غالي التراب

اد إيه بيموت عشانه
ياما ناس كتير احباب

اد إيه مروي بدمانا
ودموع ما ليها حساب

اد إيه مليان كرامه
تحتيه شرف وإباء

ريحة البطولة ويا الشهامه
بتفوح من الاشلاء

تحتيه رجوله حاضنه الطفوله
وشيوخ معاها نساء

ازاي نسيبه ويهون علينا
لمغتصب كداب

ازاي يموت الحق فينا
وتعيش شريعة الغاب

ده تراب جدودنا وتراب ابونا
ولحد يوم الحساب

ترابك يا غزه صايناه عنينا
ما يهون علينا
تراب عربي
مش تراب أغراب

اد إيه غالي التراب

بقلمي / خالد جمال ٤/١١/٢٠٢٣