قلبك باع

ياللي اخترت البعد وقلبك
غاب عن عيني وقال يا وداع

بكره هييجي الدور على قلبك
زي ماباعني لازم يتباع

دانت ظلمت القلب ف حبك
دانت مليت الروح أوجاع

كنت زمان مجداف لمراكبك
وانت كسرت لقلبي شراع

كنت المطره بتروي ف جدبك
كنت لليلك نور وشعاع

وأنت بتخدع قلبي بكدبك
كت اشواقك زيف وقناع

عشت العمر معاك وف صفك
عمر ما قلبي أتخلى وباع

كنت ف ضهرك كتفي بكتفك
كنت لقلبك ايد ودراع

دانت مسيرك تلقى مصيرك
غربه وتوهه وخوف وضياع

ياللي وعدتك ابقى سعادتك
ابقى لقلبك زاد لو جاع

وانت وعدت بغدر كعادتك
كان احساسك ليا خداع

كلمة هقولها خلاص وهفارقك
اوعى تفكر قلبي انا ضاع

قلبي اتعلم اوي من بَعدك
لما أتألم م الاوجاع

بكره هتلقى الحزن محاصرك
عمرك عايشه عذاب وصراع

لما تحس بندمك كسَرَك
اصلك بعت اللي ما يتباع

بقلمي/ خالد جمال ١٣/١٢/٢٠٢٣