سرَّاقه
سراقه عيونه وكحل العين
بيشاغل فينا ويتشاقى
سراقه يدوب وف غمضه عين
تخطف ف قلوبنا العَشَّاقه
ما تقوللي السحر ده جايبه منين
والنظرة القاتلة الحرَّاقه
دي عصابه وعامله لقلبي كمين
وانا قلبي ضعيف مالهوش طاقه
الجفن انا شايفه معاه سكين
بيجرَّح روحي المشتاقه
والنني كمان يسكت لأ مين
بيخش ويقلبها خناقه
والرمش واخدني معاه على فين
ثبتني وقاللي على رواقه
فيه يابني تحرِّي بطاقتك فين
قلتله دي عنيك ليا بطاقه
فتشني بإيده شمال ويمين
حسيت بإيديه خطفت حاجه
بصيت على قلبي ده راح على فين
خده مني بخفّة وبكفاءة
ده حرامي سرقني ف غمضه عين
وسلاحه عيونه الفتاكه
سراقه
بقلمي/ خالد جمال ٢٠/١٢/٢٠٢٣
خاص بالنصوص المميزة
D. Hodaaabdo 
أضف تعليق