*** ضحكة ف قلب الخوف ***
يا ضحكة مطوية جوه خوف السنين
يا دمعة مكوية فوق خدود العين
بسمع أنينك شوقك حنينك
يزعق يقول ليه فرحي سجين
عايشة في غابة فيها الديابة
تنهش ف لحمك تمحي ملامحك
يهدوا فيك وف اللي بانيك
ويغنوا جرحك على الربابة
الله بعونك قادر يصونك
من غدر خاين بيزيد شجونك
بس وقت المحن فيه الرجال بتبان
تعلي صوت الوطن وتنسى مين غلطان
نجوع وناكلها حاف راضي ومش زعلان
وتعيشي يا بلدي حرة ما تركعي لجبان
واللي باع فيك وهجر ما نحطه في الحسبان
يكفي أنه باع ضميره والبايع هنا خسران
دا نبت شيطاني بين الورود مغروس
عايش على دمك بينخر زي السوس
لغيرك تنحني رأسه وفوق إيديها يبوس
وأنت اللي عاش من خيرك
فوق إيديك يدوس
دلوقت شافك عفية
والصرخة طالعة قوية
تقولي لا للتخين
ما يهمك التضحية
هتفضلي دايما بهية
الحرة والأبية
شايلة كفنك بايدك
وما تفرطي في القضية
تطلع من قلب الخوف
ضحكة بصوت الدفوف
تغني تعيشي يا بلدي
محفوظة برب رؤوف
***********************
بقلم / مصطفى كرم
خاص بالنصوص المميزة
D. Hodaaabdo 
أضف تعليق