*** الطير الباكي ***
يا طير أبيض جميل باكي
وسايل الدمع فوق خده
محبوس جوه اهاته
وسور مرسوم على كده
يعاني منه ويلاته
وكتر الهم له هده
صاحبه غشيم ولا يعرف
مآسيه واللا إيه بده
احكي وقولي ايه همك
اصرخي بالصوت ولا يهمك
وعيشي مرة من نفسك
يمكن الصرخة دى تهمك
هقولك ايه على حالي
والروح جوايا بتعاني
الكل يشوفني يحسدني
ويقول دي صرحها عالي
صحيح سكني حرير ف حرير
وعندي م الدهب قناطير
لكن مسلوبة من نفسي
ما ليا كلمة أو حق أطير
فنيت نفسي عشان الغير
حب وحنان وقلب كبير
ما سمعت كلمة تبل الريق
او نظرة تدل على التقدير
ممنوع عليا عشان الناس
ممنوع يكون لى قمر وناس
ممنوع الضحكة تعرفني
عايشة يادوب اخدم وخلاص
عايشة وأجنحتي مكسورة
مكبوت احساسي مقهورة
ولما تشوفني في البرواز
تقول والله أمووووورة
قافلين عليا طاقة نور
بانيين حواليا ييجي مئة سور
ذل وإهانة وحب أناني
بإيد سجان بشع مغرور
كل حلمي أطير بأمان
وأعرف يوم طعم الحنان
بكلمة حلوة أسمعها
مش عايزة شكر أو عرفان
عايزة بس لما اطير
ما أخاف صياد أو سجان
فإياك ع الصورة تقول الله
أو تنهش في خلق الله
سيب الجرح وألامه
ما تدرى خفاه واللي جواه
*************************
بقلم / مصطفى كرم
خاص بالنصوص المميزة
D. Hodaaabdo 
أضف تعليق