الفرق بيني وبيني
هو انا نفس الأنا
هي العيون نفس الجفون
بس اليمين خدها الحنين
وكأن عدي عليها مية سنة
بس الحقيقة إنها هي أنا
أما الشمال عانت وشقيت
وحفرت بضوافرها صخر المحال.. عدت سنين من عمرها. والعلامات دي
عزها وفخرها
نفس الرموش..
من غير رتوش
ولا زينة تغطي كبرها
برضه الشمال هي أنا
بس بعد ما عدي العمر
وكبرت كام سنه
اللي عايش بالأتنين
هو أنا.. قلب صغير
وروح متبعترة
وسط المعامع متنتورة
تجمع حصاد السنين
خطوط علي الخدين
وأنتفاخ جفون العين
بس الحقيقة اللي مالهاش
ستارة تداري علامات السنين
إن الفرق بين الأنا والأنا هو أنا
رويدا عبد الحي