قصيده بعنوان (ياخي اخرتها ايه)

قولي ياخي اخرتها ايه
أقل مشكله ترفع البندقية
تضربلك طلقتين فواقي
وفرح العمده بيجاملوا فيه
ولما الفاس
توقع في الرأس
وتبقي وحيد بدون ناس
الكل ليه بيت بيخاف عليه
بقيت زي الفار المبلول
في السجون ياخي مسجون
مش هتفرق لو مقتول
بيتك الخراب عشش فيه
وياريتها جات على كده
تركتك ولادك كبش فدا
واقرب ما ليك هو العدا
خليتها حريق ومين يطفيه
عامل نفسك سبع برومبه
وأول واحد خدت زومبه
خراب عقلك خلاك في حرقه
حتي خيالك بتخاف منيه
دم المسلم علي أخيه حرام
سلكت ليه طريق الشيطان
اللي احنا فيه والله جنان
نسيت ربنا أمرنا بأيه
بنزعل لو شتموا الصعايده
او قالوا كلام وحش وبمزايد
م إحنا اللي نارنا قايده
علي بعضنا نرفع البندقيه
صدقوا وقالوا مخنا مقفول
كل يوم واحد مقتول
داحنا مخنا مخ عجول
عايزين تبن وناكل فيه
م خلاص مات فينا الكبير
وبقينا بنسمع العويل
والرجال بيقودها صغير
شوفت بقا اخرتها إيه
مفيش حد بيقول عيب
كأنا في غابه اسد وديب
لطختوا العمم والجلاليب
دم سايح غرقنا فيه
فين المشايخ والعلماء
فين الكبير والأاباء
تركتوا ليه الجهلاء
كيف الغنم ناقصه رعيه

شاعر العاميه
نبض الصعيد الجواني
خليفه الأبنودي
أدهم السمهودي