أنا والليل
           نورا القاوى 🌹 مع الشاعر سيد محمود
سارح والسما صافيه
وكل حواسي مشدوده
لنجم بعيد
بيسرح في براح الكون
اشوفه مره بينور
يشق الضلمه والعتمه
ويظهرلى بدون مواعيد
ياخد كل شيء مني
يشتتني
يخلي العقل يتلخبط
يجيب الماضي والحاضر
يعيد ويزيد
اشوفك ورده ف الملكوت
طايره ف السما عاليه
اشوفك وكل ما اشوفك
أحسك عيد
يا غاليه والنجوم طاله
بناديك
وكل طله من عينك
تداوي جراح
ماانت الآه والبسمه وكل جديد
عارفه ليه بشوف النجم
وابص لصورته وافتكرك
لأن إنت ف ليلي حلم
اشوفه وقت مانا عايز
مطاوعني حد الشوق
ولا لحظه كان لي عنيد
مسكت الورقه ودوايه
وجبت سن قلمي البوص
عشان أكتب لقمرايه
بعد بسم الله يا غاليه
أنا كويس
وتوب الغربه زي حديد
ادوب فيه مابيدوبش
واغسل كل يوم همي
وأقول هانت
تاخدني الغربه من تاني
لجرح عنيد
أنا المشتاق ومش قادر ع فراقك
انين الصمت
لو الايام بتتكلم
تفضح سري وياكي
وكيف الدمعه والضحكه
وكيف الحزن والفرحة
وكيف حالي مع حالك
بدون مواعيد
امانه ياكل ماليا
وأغلي من قصور كسري
وعندي الدنيا لو جنه
تكوني إنت براحي اكيد
🥀🥀🥀🥀🥀🥀🥀🥀🥀🥀
شمس الصبح وضي نهار
حضن بياخد رحله عمري
ويوديني أبعد مشوار
نور الليل وضي القمرة
قاعده ياقلبي ف بعدك صابره
فكره تروح والتانية بتيجي
عاشقه الصبر بأمر حبيبي
والأيام بتعدي أيام
مره تقول البعد نصيب
مره تقول الفرقه حرام
لسه بشوفك
كل العالم وإلى مافيه
كل النور والخير والضي
كل الحب إلى مالوش زي
كل رضاي بالمقسوم
بس العين مخاصمها النوم
أنا والليل والناي أصحاب
لحن يبكي على الأحباب
وإلي يصبر حالي وحالك
كل حروف بيشلها جواب
يمكن عدي بلاد وسحاب
عزف حزين اه ياليل موالك
تسرح بينا ندوب ف وصالك
يطلع فجر في كل مكانا
يفضل حال الليل مع حالك
أنا والليل عايشين أغراب
بس هترجع تاني الفرحه
لما تدق علينا الباب
لما الدمعه تروح وتسافر
لما الحزن بعيد هياهجر
لما قلوبنا تعرف تضحك
لما أملنا معنا يعافر
لما أشوفك وإنت راجعلي
وتعيش تاني معايا للآخر