صرخة الاقصى
الاقصى عمال بيصرخ
وينده بصوت   حزنان
  زلزل  معاه    الشجر
  والحجر       الصوان
سئل اللي فايت ورايح
واللي ساكنين   الخيام
        وين العرب ؟
        قالوله نيام
طب   وغزه   والحصار
    الاباده   الدمار
القنابل  ليل     نهار
والعرب شايفين اللي صار
وللقضيه    قفلين  الستار
     وادى اللي  صار
     وادى اللي  كان
عيشين ف زل وانكسار
          للامريكان
عيشين ف ملهى وترف
ف أحضان الغوانى جوه بار
       مش برضه عار
مع نفس صرخة صوت ام الشهيد
صوت الكاسات ولعب القمار
يا غزه فين الولد فين العرب
ذرة غضب حبة صخب
ولا الولد صابه الخرس
باينه خايف من الحرص
باع اللجام ويا الفرس
والنخوه ضاعت والشرف
والدم فى عروقه شرد
يادى المهانه  والجرس
طب هو فين صلاح الدين؟
   مات بقاله سنين
واللي قاله كان هنا
واللي قاله مش انا
واللي قال مشفتوش
من هنا اتغيرت كل الوشوش
لجا لحيله وبفركه واحده فى الفانوس طلع عفركوش
قال ماانا كنت قاعد ف الفانوس
تطلعنى ليه ف زمن حمو وشاكوش
انا من سلالة جن صالح
فى الشر والهلس مالوش
مش هى دى الوشوش اللي فاتت
         اظن ماتت
واللي ماتو مابيرجعوش
واللي شايفه النهارده فيهم ماتستغربوش
      وشوش غير الوشوش
وش طالح وش كالح بتاع مصالح
همه المناصب  والعروش
ووش شارد تملى سارح
فى كعوب الصبايا وسحر الرموش
ووش مايع فى الأصل بايع
    ام القضيه بحبة قروش
ووشوش كتير متلونه
عربى بلون غربى ماتفرقوش
فبلاش تسأل عندنا
   وتقول كان   هنا
عمر الوشوش المتلونه
     ماتصنع  جيوش
انت بتسأل عن جدع راح
وجه بداله  عالم فشوش
وإن قلك حد فيهم نصر القضيه
          ماتصدقوش
باعو ترابك وارضك
وفى كل يوم ضحايا ونعوش
باعو ترابك وارضك
وراح دم الشهيد بلوش
         الخلاصه
        ان دول كدابين
اسئلهم ليه متشتتين
ورب العزه لو اتحدوا
هتلاقي فى كل واحد فيهم
        صلاح الدين